‘n Blom uit Pole

DIE GEKNEUSDE POPPIE UIT POLE Die pragtige tienermeisie, Czeslawa Kwoka, ʼn duidelik vreesbevange kind wat graag net wou lewe, maar deur die Nazi’s vermoor is. Dit is die beeld wat by die skrywer, Louis Rautenbach Snr, spook en gelei het tot hierdie interessante boek. Dit handel nie net oor Czeslawa nie, maar oor die geskiedenis van die oorlog, die toeloop en die nagevolge. Czeslawa het waarskynlik vir maande lank met die vrees in haar meisiehart geloop, dalk met die hoop dat vrede en vryheid sou kom en dat sy weer in die lente in die veld naby haar dorpie tussen die rooi papawers sou kon dans. Dalk het sy gewens dat sy weer jongmeisiedrome kon droom. Dat sy weer tuis kon wees. Al sou dit dalk sonder haar geliefde moeder moes wees. Czeslawa het die gesig geword het van die kinders wat in Auschwitz en elders in Europa gedurende die oorlog vermoor is. Haar gesig straal verskeie emosies uit, insluitend verwarring en hartseer terwyl haar kakebeen van die spanning saamgepers is. Al hierdie emosies is in een enkele foto vasgevang. Czeslawa is die blom uit Pole. Hierdie treffende boek, 'n Blom uit Pole, gevul met soveel gemengde emosies, is ʼn openbaring van ʼn era waarin ons ons nie weer wil bevind nie. Louis skryf met kundigheid en deeglikheid, dra kennis oor wat die leser interesseer en fassineer. Met goeie vernuf word die lewe van Czeslawa deur al die gebeure geweef en is die slot ʼn ode aan elke onskuldige kind wat gesterf het in hierdie gruwelike oorlog. UITTREKSEL: Die dae gaan intussen verby, en die lente breek weer aan. Die rooi papawers lyk deesdae anders, so asof hulle blomknoppe aan die groen stingels effens hang. Dalk voel hulle ook nog hartseer, net soos sy. Sy pluk nogtans vir haar ma ’n arm vol van die geliefkoosde blomme. Hulle tyd gaan altyd so gou verby.